Encontro de Lúa Chea: Utopías realizables para o rural galego. O Viso e o CDR Ancares

Os 'Encontros de Lúa Chea', un programa de debate sobre cuestións de actualidade organizado polo colectivo universitario Proxéctate en Galego e incluído dentro da programación dO

Outono Cultural

, ofrece o xoves 1 de outubro, ás 19.00 horas, na cafetaría da Escola Politécnica Superior de Enxeñaría do Campus de Lugo, o faladoiro 'Utopías realizables para o rural galego. O Viso e o CDR Ancares'. Esta iniciativa enmárcase dentro da programación artellada ao abeiro do convenio asinado por Universidade de Santiago de Compostela, Cultura e Turismo do Concello de Lugo e Vicepresidencia da Deputación Provincial de Lugo.

Sobre o encontro

O medio rural está sufrindo, en xeral, un proceso de envellecemento da poboación e perda de servizos que é á vez causa e consecuencia de que a xente e os servizos se vaian concentrando nos núcleos urbanos. Para comezar este novo curso, queremos poñer o foco sobre dúas entidades que combaten esta situación con respostas innovadoras e profundamente ligadas ao territorio.

Os centros de desenvolvemento rural (CDR)

O Viso

(en Lodoselo, Sarreaus) e

Ancares

(en Cervantes) representan modelos de intervención comunitaria que sitúan as persoas no centro da acción social e do desenvolvemento rural. A través da prestación de servizos de proximidade, do impulso a redes de apoio mutuo e da creación de espazos de encontro e participación, ambas as entidades contribúen a garantir dereitos, a mellorar a calidade de vida da veciñanza e a fixar poboación no rural. O segredo do seu éxito está en deixar de agardar a chegada dos recursos externos que esporadicamente poida recibir o territorio, e apostar por construír desde abaixo, contando co coñecemento, as capacidades e as necesidades das propias comunidades.

O seu labor abrangue ámbitos tan diversos como a atención a persoas maiores, o acompañamento a colectivos vulnerables, a dinamización sociocultural, a conciliación familiar, a inserción laboral, a dinamización económica ou a promoción da igualdade, sempre desde unha perspectiva integral e comunitaria.

Descubriremos como se crearon, como funcionan, os seus plans de futuro e en que medida estes modelos son extrapolables a outros lugares de Galicia, a través da voz dos seus protagonistas: Lola López Pérez, do CDR Ancares e

Antonio Rodríguez Corbal

, do CDR O Viso.

Fuente:

https://www.usc.gal//gl/servizos/area/cultura/eventos/encontro-lua-chea-utopias-realizables-rural-galego-viso-cdr-ancares